Aardvark: lankidetza bidezko bilaketak sare sozialen bitartez
Bi pertsonak edo gehiagok elkarturik gai bati buruz egiten dituzten bilaketei esaten zaie lankidetza bidezko bilaketak.
Gaur egun sarean hainbat tresna daude eginkizun horretan laguntzen dutenak. Hona horietako bat:
Erabiltzaileek kontsultak egiten dizkiote sistemari, dela Aardvark webgunean bertan, dela emailez , dela mezularitza bidez. Aardvark-ek kontsulta identifikatzen du eta, horren arabera, denbora errealeko txat bidez edo posta elektronikoaren bidez, harremanetan jartzen du kontsulta-egilea galdetu duen gaian adituak direnekin. Iaz Googlek erosi zuen Aardvark.
Erabiltzaile batek Aardvark-en izena ematen duenean, Aardvark erabiltzailearen bat-bateko mezularitzako zerrendan gehiturik gelditzen da. Erabiltzaileak kontsulta bat egiten duenean, Aardvark-ek lagundu egiten dio, mezuen bidez, zer egin behar duen adieraziz. Bat-bateko mezularitza erabiliz gero, komandoak erabil daitezke kontsultaren parametroak zehazteko, beste erabiltzaile batzuk gonbidatzeko edo laguntza lortzeko.
Bi interakzio mota erabiltzen ditu Aardvark-ek kontsulta bat erantzuteko. Lehenbizikoa erabiltzaileari mezu bidez kontsulta bati erantzun nahi dion galdetzekoa. Aldian-aldian Aardvark harremanetan jartzen da erabiltzailearekin, posta elektronikoaren edo mezularitzaren bidez, beste norbaiten kontsultari erantzuna emateko pertsona egokia dela uste duenean. Aardvark-ek kontsulta-egilearen adiskideen eta adiskideen adiskideen artean bilatzen ditu erantzule izan daitezkeenak. Aurkitzen dituen adiskide guztiei kontsulta bidali ordez, profiletan begiratzen du, kontsultarekin zerikusia duen informazioren bat badagoen ikusteko.
Aardvark-ek erabiltzaileari kontsulta bat bidaltzen dionean, erabiltzailea erantzuteko prest agertzen bada, kontsulta bideratzen dio, galdera-egilearen izenarekin batera. Erantzuleak eman dezake zuzenean erantzuna edo eman dezake egoki erantzun dezakeen adiskide baten izena edo posta elektronikoko helbidea edota uko egin diezaioke erantzuteari. Aardvark-ek erabiltzaile jakin bati eguneko kontsulta bat baino gutxiago igortzen dio eta erabiltzaileak bere aldetik adieraz dezake zer maiztasunekin eta zer egun eta ordutan dagoen kontsultak jasotzeko prest.
Aardvark-ek Google Talk, Windows Live Messenger, AOL Instant Messenger eta Yahoo Messenger mezularitza-zerbitzuak onartzen ditu.
Bigarren interakzio moduan, erabiltzaile batek mezu bat bidaltzen du Aardvark-era edo honen webguneko Answering atala bisitatzen du eta Aardvark-ek planteatu berria den, artean erantzunik jaso ez duen eta bere profilarekin bat datorren kontsulta bat aurkezten dio.
Comments
Post a Comment